CAREGARI IN LOTA, ON SPETAGOLO PIETOXO

El 1 disenbre Basàn, la conbricola dei caregari la ga organixà na manifestasiòn. Chela stesa xente ca la ga tradio, deso la siga de onirse pa l’indipendensa.

Sti caregari li se ga onio inte on partito politego ca el va soto el nome taliàn de “il veneto decida”. Vardemo puito chi ca se gavarìa onio so sto partito:

-Luca Zaia: no el xe pi co la Lega Nord, i lo ga molà tuti e el ga on bexogno desparà de na carega. Cusì el xe drio cavalcàr el cavalo de l’Indipendensa pa ver na carega. Propio lu ca pa 20 ani ga inbrojà el Veneto co le bale sol federalixmo, el munisipalixmo, e el se ga inpienà de schei. El xe on cadavere politego incapase de far e sensa corajo, solo caregaro rufiàn co i taliani.

-Luca Azzano Cantarutti: presidente de on partito ca no el existe pi a ndo no i pol gnanca doparàr pi el sinbolo. On partito desfà da l’anbisiòn sòa e de Alessio Morosin, caregari de natura ca li salta da on partito a st’altro co la dixinvoltura de le gaxele afregane e magari li xe drio anca ciapar el vitalisio.

-Davide Guiotto anbisioxo capeto de na asociasiòn ca la ga frenà l’indipendentixmo parche danejava i partiti ca la sponsorixava.

-Goadagnin Antonio: naltro super caregaro ca fa i so coleghi, ghe fa isteso juràr fedeltà a l’italia, servirla in divixa militar o politega e dopo rinegarla pa transformarse in indipendentisti.

Ca fine porli far tuti sti caregari rento on partito? Cosa farli dei magnoni so na tola a ndo ghe xé solo on piàto? I se magna fra de luri, i scominsiarà tirarse cortelà drìo le spale.

I musculini i xe finii tuti rento na sporta! Fra l’altro a parte Morosin i xe tuti intabacà co la cexa catolega romana, senpre parecià obedir a vescuvi e cardenal.

Eco, a Basàn el 1 disenbre a xè sciopà el de ghejo soto el palco.

Zaia el podea parlar co el volea, lu segon el teorema de st’altri el sarìa la prima dona, el sarìa el bo ca el tìra. Soto el palco se ga asistio al barufòn fra Morosin e Cantarutti pa chi ca gheva da parlàr par primo. Goadagnin ga parà xò (o cusì o pomì), invese Guiotto Davide incasà nero parche ghe ga tocà parlar pa oltemo fa i servi. I caregari i barufa anca pa parlar sol palco, pa ndar a la tele pa finir sol jornàl, figuremose co sarà ora de prexentar le liste! I sarà tuti in còa urtarse e sgumiàr fa i boce co riva la befana portar i prexenti in piàsa. I sarà barufoni e pache da orbi, e a xe probabile ca i scominsie pensar de segar el palo. I scominsia capirlo deso ca metarse tuti rento na stansa i scominsia balar fin ca no finise la muxica e i corarà sercar la onega carega ca resta, sa la resta. No i ga mia gnancora capìo ca el sarà Grillo far la napula de ori, sincoe de maso e tute le scoe! Ma sti caregari, cato-pseudo indipendentisti, xeli drio xugàr a ciapanò o chi fa manco?

O forse i se ga metesto dacordo ca chi a no ciapa la carega col voto, i lo mete rento le comision, rento i consorsi, rento le cooperative, rento coalche dirijensa col redito da poxision?

E i veneti paga, martufà naltra olta.